تحربتي في مباراة الماستر بغيت نشاركها مع اعزاء المجموعة
الغاية: التحفيز والأمل
التخصص: قانون العقار والتعمير
في بحر سنة 2018 احصلت على شهادة الاحازة فالقانون الخاص، ونظرا لكون السنة كانت متعبة بالزاف بالنسبة ليا وانني درت مجهود كبير فالفصل 6 بالخصوص باش نحصل على ميزة حسن جداً فيه وخا مجبتهاش جبت ميزة حسن (15.36) جاني الإرهاق والتعب الشديد ملي اخديت الاجازة، فقررت انني مندوزش داك العام الماستر ونخلي حتى لعام لي بعدو، وصل وقت التسجيل مسجلتش وبإلحاح كبير من طرف بعض الاصدقاء دياولي وفاخر يوم ديال التسجيل سجلت الكترونيا ووضعت الطلب ديالي، كان باقي اسبوع للامتحان المباراة، بمعنى المدة لي وجدت فيها الامتحان هي "اسبوع فقط" اشنو درت فهاد الاسبوع؟
بديت بمدونة الحقوق العينية وقانون التحفيط العقاري قريت من code مباشرة وكنت كنحاول نعقل على المنصوص والارقام ديالهم "الاهم منها فقط" راجعت محاضرات ديال مدونة الحقوق العينية ديال س5، قريت 2 مقالات واحد ديال التوثيق فالتصرفات العقارية وواحد ديال الامن العقاري، دخلت google قلبت على قوانين التعمير كتبتهم فورقة وكل قانون اختصرتو في 2 اسطر الفكرة العامة على القانون فقط، اهم حاجة حفظت 2 مقدمات مختلفين بخصوص العقار والتعمير فيهم الشروط المقدمة (اطار عام، خاص، تطور تاريخي، اهمية الموضوع..)
جا يوم المباراة المعهود، جلست فالمدرج فالاول تسلمت ورقة التحرير ثم تفرقو اعلينا الاسئلة، ارل شيء اخوتي ملي شفت السؤال جاتني ضبابة كحلة على عيني والدوخة، عنري شفت ذاك السؤال يشمل شق فالمدونة الحقوق العينية وشق فالتحفيط وشق فالتوثيق وشق فالتعمير، افكاري كنت مشوشة ماعرفت ماندير جاتني الخلعة والدهشة، قريت السؤال شي 3 مرات مافهمتوش، بديت نقرا ونفكك مصطلحات كلمة كلمة بدات كتضاح ليا الفكرة اشويا اتفكرت انني حافظ المقدمة بديت نكتب مباشرة فالتحرير دون استعمال الوساخ باش مانضيعش الوقت صايبت الاشكالية ثم اسئلة فرعية وقسمت الموضوع ديالي ل2 مباحث، ومزال اتذكر انني استعملت 5 اوراق التحرير، غاتسولوني بالزاف كتبت ولا العدد كبير مقارنة مع 3 ساعات انقولكم أولا ماستعملتش اوراق الوساخ ثانياً ان طبيعية الموضوع تقتضي ذلك و تستوجب التحليل المعمق..
نصيحة 1: متسمعش للناس انه الماستر خاسك توجدلو مدة طويلة، تقدر توجد غير نهار وتعرف اشنو وجدتي وتنجح ويقدر واحد وجد شهر ومعرفش اشنو يوجد وماينجحش
نصيحة 2: خطط ودير برنامج مراجعة قبل ماتبدا تراجع وحدد الاولويات لي تراجع بدا بالصعب وسير لي ساهل لأن فالبداية كتكون عندك طاقة كبيرة وفالاخير كتبدا تعيا وكينقص التركيز
نصيحة 3: المقدمة ديما خاسك تكون حافظها سواء دوزتي كونكور دالماستر ولا كونكور ديال الوظيفة "اسمع مني هذا سر النجاح1" واستغلال الوقت، كتربح اكثر من 30 دقيقة عوض التفكير فمقدمة اذا ماجيتيش حافظها
نصيحة 4: سمع لصاحبك لي يعطيك افكار ايجابية ومشجعة وبعد على المحبطين
نصيحة 5: ماتقراش بالليل قرا فالصباح واحسن وقت للمراجعة بعد الفجر حتى ل9 دالصباح "سر النجاح2"
نصيحة 6: نهار تدخل للامتحان وتشوف راسك تدهشرتي مابقيتي عاقل على والو فكك المصطلحات ديال السؤال مثلا جاك "العقار وتحقيق التنمية" كتب العقار: اشنو كتعرف اعليه؟ وعاء عقاري، مال، ثابت، نوعين بالتخصيص وبالطبيعة... التنمية: التطوير، التحديث، الاستثمار، المشاريع.. خاسك تكون افكار ذاتية لراسك.